മത്സരം മുറുകിയാൽ..!

കഴിഞ്ഞ ദിവസത്തെ ബസ്സപകടത്തിനെപ്പറ്റിയുള്ള ചാനൽ വാർത്താ ബുള്ളറ്റിലെ ടിവി അവതാരകന്റെ/അവതാരകയുടെ ചില ചോദ്യങ്ങൾ അവരുടെ പ്രതിനിധികളോട്..

1) ബസ്സ് ഇപ്പോൾ വെള്ളത്തിൽ മുങ്ങിയിട്ട് രണ്ടുമണിക്കൂറിലധികമായല്ലൊ, ബസ്സിന്റെയുള്ളിൽ ആരെങ്കിലും കുടുങ്ങിക്കിടപ്പുണ്ടൊ? ഉണ്ടെങ്കിൽ അവരെ രക്ഷപ്പെടുത്തുവാൻ കഴിയുമൊ..?

2) ബസ്സിലെ അപകടത്തിൽ നിന്നും ഒരമ്മ അത്ഭുകരമായി രക്ഷപ്പെട്ടു, എന്നാൽ തന്റെ കുഞ്ഞിനെ കാണുന്നില്ലെന്ന് പറയുന്നു, ലല്ലൂ ആ ബസ്സിൽ കുഞ്ഞുങ്ങൾ ഉണ്ടായിരുന്നൊ..? ഉണ്ടെങ്കിൽ അവർ രക്ഷപ്പെട്ടിട്ടുണ്ടൊ..?

3) കുഞ്ഞിനെ കാണുന്നില്ലെന്നുപറയുന്ന ആ അമ്മയുടെ ഇപ്പോഴത്തെ വികാരമെന്താണ്..?

4) ബസ്സിപ്പോൾ എൺപതടി താഴ്ചയിലാണല്ലൊ അതിൽ എത്രയടി ചെളിയുണ്ടാകും..?

5) ബിനി.. ബസ്സിൽ നാല്പതിലധികം ആളുകൾ ഉണ്ടായിരുന്നുവെന്നല്ലെ പറഞ്ഞത്. ഇരുപതുപേർ രക്ഷപ്പെട്ടു, പത്തുപേർ മരിച്ചു, ബാക്കിയുള്ളവർ വെള്ളത്തിൻ തന്നെയുണ്ടൊ..? അവരെ കരക്കടിപ്പിക്കുവാൻ എന്തെങ്കിലും മാർഗ്ഗമുണ്ടൊ..? ഉണ്ടെങ്കിൽ അതെന്താണ്..?

*
*
*
*
*
മൊബൈലിൽ ചിത്രങ്ങളെടുക്കുന്നവരെ പരിഹസിക്കുന്ന ചാനലുകാർ, ചാനലുകാരുടെ ബാഹുല്യവും പിന്നെ അവരുടെ ചോദ്യങ്ങളും അഭിമുഖങ്ങൾകൊണ്ടും അപകടത്തിന്റെ ഭീതിയിൽ കഴിയുന്ന രക്ഷപ്പെട്ടവരേയും ബന്ധുക്കളെയും വീണ്ടും കൊല്ലാക്കൊലചെയ്യുന്നതുകാണുമ്പോൾ... നമുക്കുവേണ്ടിയാണൊ ഈ ചാനലുകാർ ഈ തറപ്പണിയെടുക്കുന്നത്..? ആണെങ്കിൽ നാമാണ് ഒന്നാം പ്രതികൾ..!!

*
*
*

2013-14 ൽ ചന്ദ്രനിൽ മനുഷ്യനെയിറക്കുമെന്ന് ഐ എസ് ആർ ഒ.., പ്രാഭാകർ..ഞാനിപ്പോൾ നിൽക്കുന്നത് ചന്ദ്രനിലുള്ള ഒരു വലിയ പാറയുടെ മുകളിലാണ്. ഇന്ത്യയിൽ നിന്നും ആദ്യമായി മനുഷ്യനെയും വഹിച്ചുകൊണ്ടുള്ള ചന്ദ്രയാൻ-2 പേടകം താഴ്ന്നിറങ്ങുന്നത് എനിക്കിപ്പോൾ കാണാൻ പറ്റുന്നുണ്ട് പ്രഭാകർ. ഞാൻ നിൽക്കുന്ന പാറയുടെ തൊട്ടടുത്തായിട്ടായിരിക്കും അത് ലാന്റ് ചെയ്യുന്നത്..!!!

ആത്മഹത്യ..!

കോളേജ് ജീവിതം..
വര്‍ണ്ണങ്ങളുടെ വസന്തം.
അവന്‍ അവളെ കണ്ടു അവള്‍ അവനേയും
ആദ്യം നോട്ടം പിന്നെ ചിരി..പിന്നെന്തായി കൂട്ടുകാരായി
ആദ്യം അവര്‍ തമ്മിലറിഞ്ഞു ഒരിക്കലും പിരിയാന്‍ കഴിയാത്തവണ്ണം കൊളത്തിയെന്ന്
പിന്നെ കൂട്ടുകാരറിഞ്ഞു
വീട്ടുകാരറിഞ്ഞു
നാട്ടുകാരറിഞ്ഞു

പെണ്ണിന്റെ അച്ഛന്‍ പറഞ്ഞു ഈ ബന്ധം ഇതോടെ അവസാനിപ്പിച്ചൊ അല്ലെങ്കില്‍ ഞാനിവിടെ തൂങ്ങും, എവിടെ?

ചെക്കന്റമ്മ പറഞ്ഞു അവളൊഴിച്ച് നീ നിനക്കിഷ്ടപ്പെട്ട ഏതു പെണ്ണിനെ കൊണ്ടുവന്നാലും ഞാന്‍ രണ്ടു കൈയ്യും നീട്ടി സ്വീകരിക്കും..!

എന്തിനു പറയുന്നു ആകെ കോലാഹലമായി

യുവാവും യുവതിയും ( പഠിക്കണ കുട്ടികള്‍ പെട്ടെന്ന് യുവാവും യുവതിയുമായി ) തീരുമാനമെടുത്തു ഒരുമിച്ച് ജീവിക്കാനായില്ലെങ്കില്‍..

ആത്മഹത്യ..!!!

അത് പരിഹാരമാണൊ? അല്ല. എന്നാല്‍ ഇവര്‍ക്ക് അതു മനസ്സിലാകുമൊ ഇല്ലേയില്ല.

എന്നിട്ടൊ, എന്തായാലും തീരുമാനിച്ചു ആത്മഹത്യ ചെയ്യാന്‍ അപ്പൊ അത് വീട്ടുകാര്‍ക്കുള്ള ശിക്ഷയും കൂടിയാകണം.
ശരി, ക്രൂരമായ രീതിയില്‍ മരിക്കാം.

വിഷം കഴിച്ചാലൊ..വിഷത്തില്‍ മായമുണ്ടെങ്കിലൊ?

തൂങ്ങിച്ചത്താലൊ..കയറു പൊട്ടി വീണാലൊ? അതുമല്ല അതു വീട്ടുകാര്‍ക്ക് ഒരു വലിയ ശിക്ഷയായി തോന്നില്ല.

എന്നാപ്പിന്നെ ഞെരമ്പു മുറിച്ച്.. അതു വേണൊ ചെക്കനിഷ്ടമായില്ല.. അതും തള്ളിക്കളഞ്ഞു.

എങ്കില്‍ ട്രൈനിനു മുന്നില്‍ ചാടിയാലൊ..അതിന് അങ്ങ് ആലുവ വരെ പോകേണ്ടെ? അതും ചീറ്റി.

ഉറക്ക ഗുളിക കഴിക്കാം..ഹേയ് അത് സുഖമരണമാകും. അതും വീട്ടുകാരെ ബുദ്ധിമുട്ടിക്കില്ല.

വീട്ടുകാരെ ശിക്ഷിക്കണം എന്റെയും നിന്റെയും ബന്ധം അവസാനിപ്പിക്കാന്‍ പറഞ്ഞതിന്. അവര്‍ എന്നും വിലപിക്കണം നമ്മുടെ ബന്ധത്തെ എതിര്‍ത്തതിന്.

അവന്‍ അവളും ഒരേ സ്വരത്തില്‍ പറഞ്ഞു ഇനിയിപ്പൊ ഒരു വഴിയേ ഞാന്‍ കാണുന്നുള്ളൂ. അങ്ങിനെ ആ വഴി അവര്‍ തിരഞ്ഞെടുത്തു. അത് നിശ്ചയമായും വീട്ടുകാര്‍ക്ക് വലിയൊരു ശിക്ഷയാകും അവര്‍ ഉറപ്പിച്ചു,
*
*
*
ടീവിയിലെ വാര്‍ത്താ ചാനല്‍ കാണുക കേള്‍ക്കുക അങ്ങിനെ ഓരോ ദിവസം നീറി നീറി മരിക്കുക.

വീട്ടുകാര്‍ക്ക് ഇതില്‍പ്പരം ശിക്ഷ കിട്ടാനുണ്ടൊ..? ഇല്ലേയില്ല..!
*
*
*
*
ശ്രീ അപ്പുവിന്റെ ഈ പോസ്റ്റ് വായിച്ചപ്പോള്‍ തോന്നിയ ചിന്ത